അബുദാബി : പാരീസില്‍ ഒളമ്പിക്‌സിന്റെ തിരശ്ശീല ഉയരാന്‍ മണിക്കൂറുകള്‍ മാത്രം ബാക്കി നില്‍ക്കെ മെഡല്‍ പ്രതീക്ഷയുമായി യുഎഇ സംഘവും. ഇക്വസ്ട്രിയന്‍, ജൂഡോ, സൈക്ലിങ്, നീന്തല്‍, അത്‌ലറ്റിക്‌സ് എന്നീ അഞ്ച് കായിക ഇനങ്ങളില്‍ 14 സ്വദേശി അത്‌ലീറ്റുകള്‍ മത്സരിക്കുമെന്ന് യുഎഇ ദേശീയ ഒളിംപിക് കമ്മിറ്റി അറിയിച്ചു. 26ന് ആരംഭിക്കുന്ന ഗെയിംസ് ആഗസ്റ്റ് 11 ന് സമാപിക്കും. ഔദ്യോഗിക ഉദ്ഘാടന ചടങ്ങിന് രണ്ട് ദിവസങ്ങള്‍ക്ക് ശേഷം നീന്തല്‍, ജൂഡോ മത്സരങ്ങളിലൂടെയാണ് യുഎഇ പ്രതിനിധി സംഘം മത്സരിക്കുക. 1984 ലെ ലോസാഞ്ചലസില്‍ നടന്ന സമ്മര്‍ ഒളിംപിക്‌സ് മുതല്‍ യുഎഇയുടെ ഒളിമ്പിക് യാത്രയിലെ ഒരു സുപ്രധാന ചുവടുവയ്പ്പാണ് പാരിസിലെ പങ്കാളിത്തം. ഒളിമ്പിക്‌സില്‍ ഉള്‍പ്പെടെ അന്താരാഷ്ട്ര തലത്തില്‍ വിജയം കൈവരിക്കാന്‍ യുഎഇ അത്‌ലറ്റുകള്‍ക്ക് കായിക മേഖലയ്ക്ക് യുഎഇ നേതൃത്വം നല്‍കുന്ന പിന്തുണയെ ദുബൈ രണ്ടാം ഡെപ്യൂട്ടി ഭരണാധികാരിയും ദേശീയ ഒളിമ്പിക് കമ്മിറ്റി ചെയര്‍മാനുമായ ശൈഖ് അഹമ്മദ് ബിന്‍ മുഹമ്മദ് ബിന്‍ റാഷിദ് അല്‍ മക്തൂം പ്രശംസിച്ചു. പുതിയ പ്രതിഭകളെ സൃഷ്ടിക്കുകയും മികച്ച പ്രകടനങ്ങള്‍ കാഴ്ച്ചവെക്കാന്‍ പ്രോത്സാഹിപ്പിക്കുകയും ചെയ്യുന്ന ഒരു കായിക വികസന മാതൃകയ്ക്കുള്ള ദേശീയ ഒളിമ്പിക് കമ്മിറ്റിയുടെ പ്രതിബദ്ധത നേതൃത്വത്തിന്റെ കാഴ്ചപ്പാടില്‍ പ്രതിഫലിക്കുന്നു. ദേശീയ അത്‌ലറ്റുകളുടെ പ്രകടനം മെച്ചപ്പെടുത്താനും ആഗോള വിജയം നേടാനും അതുവഴി യുഎഇ പതാക ഉയര്‍ത്താനും ഈ മാതൃക ലക്ഷ്യമിടുന്നതായും, അദ്ദേഹം കൂട്ടിച്ചേര്‍ത്തു. പാരീസില്‍ നടക്കുന്ന 33ാമത് ഒളിമ്പിക്‌സില്‍ അത്‌ലറ്റുകള്‍ക്ക് മികച്ച സൗകര്യങ്ങളുണ്ടെന്ന് ഉറപ്പാക്കാന്‍ യുഎഇയുടെ ദേശീയ സംഘത്തിന് ശൈഖ് അഹമ്മദ് നിര്‍ദ്ദേശം നല്‍കി. 2024 ലെ ഗെയിംസിനായി ദേശീയ സംഘത്തെ തയ്യാറാക്കാന്‍ സഹായിച്ചതിന് ദേശീയ കായിക സംഘടനകള്‍ക്കും സ്ഥാപനങ്ങള്‍ക്കും അദ്ദേഹം നന്ദി അറിയിച്ചു. കഴിഞ്ഞ 40 വര്‍ഷത്തെ ഒളിമ്പിക്‌സില്‍ യുഎഇ അത്‌ലറ്റുകളുടെ നേട്ടങ്ങളെ ശൈഖ് അഹമ്മദ് അഭിനന്ദിച്ചു, അവരുടെ കഠിനാധ്വാനവും നേട്ടങ്ങളും രാജ്യത്തിന് ശാശ്വതമായ മതിപ്പ് സൃഷ്ടിച്ചുവെന്ന് പ്രസ്താവിച്ചു. 14 അത്‌ലറ്റുകളും 24 അഡ്മിനിസ്‌ട്രേറ്റര്‍മാരും സാങ്കേതിക വിദഗ്ധരും തെറാപ്പിസ്റ്റുകളും ഉള്‍പ്പെടുന്ന പാരീസ് ഒളിമ്പിക്‌സില്‍ യുഎഇ മത്സരിക്കാന്‍ ഒരുങ്ങുന്നു. കുതിരസവാരി, ജൂഡോ, സൈക്ലിംഗ്, നീന്തല്‍, അത്‌ലറ്റിക്‌സ് എന്നീ അഞ്ച് ഇനങ്ങളിലാണ് കായികതാരങ്ങള്‍ മത്സരിക്കുക. ഇക്വസ്റ്റ്രിയന്‍ ടീം ഷോ ജമ്പിംഗ് മത്സരത്തില്‍ പങ്കെടുക്കും. അഞ്ച് പുരുഷ താരങ്ങളും ഒരു വനിതാ താരവും ഉള്‍പ്പെടുന്നതാണ് ദേശീയ ജൂഡോ ടീം. സൈക്ലിംഗില്‍ ഒളിമ്പിക്‌സിന് യോഗ്യത നേടുന്ന ആദ്യ എമിറാത്തി അത്‌ലറ്റായ സഫിയ അല്‍ സയേഗ് റോഡ് റേസ് ഇനത്തില്‍ യുഎഇയെ പ്രതിനിധീകരിക്കും. നീന്തല്‍ താരം യൂസഫ് റാഷിദ് അല്‍ മത്രൂഷി 100 മീറ്റര്‍ ഫ്രീസ്‌റ്റൈലിലും മഹാ അബ്ദുല്ല അല്‍ ഷെഹി 200 മീറ്റര്‍ ഫ്രീസ്‌റ്റൈലിലും മറിയം മുഹമ്മദ് അല്‍ ഫാര്‍സി 100 മീറ്റര്‍ സ്പ്രിന്റിലും മത്സരിക്കും. വെള്ളിയാഴ്ച സെയ്ന്‍ നദിയില്‍ നടക്കുന്ന ഗെയിംസിന്റെ ഉദ്ഘാടന ചടങ്ങില്‍ ഒമര്‍ അല്‍ മര്‍സൂഖിയും സഫിയ അല്‍ സയേഗും യുഎഇ പതാകയേന്തും. ചടങ്ങ് 3 മണിക്കൂര്‍ 45 മിനിറ്റ് നീണ്ടുനില്‍ക്കും. ഒളിംപിക്‌സിന്റെ ചരിത്രത്തില്‍ ആദ്യമായാണ് ഒരു സ്റ്റേഡിയത്തിന് പുറത്ത് ഉദ്ഘാടന ചടങ്ങ് നടക്കുന്നത്.
