സൂക്ഷിക്കുക,പരദൂഷണത്തെ

പരസ്പര ബന്ധങ്ങളെയും സ്‌നേഹങ്ങളെയും ഇല്ലാതാക്കുന്ന വളരെ മ്ലേഛമായ സ്വഭാവമാണ് പരദൂഷണം. സദസുകളിലും സാമൂഹിക മാധ്യമങ്ങളിലും പരദൂഷണം പരത്തുന്നത് മാരക രോഗമാണ്. മറ്റുള്ളവരെ കുറ്റം പറഞ്ഞുനടക്കുന്നത് വലിയ പാപവും ന്യൂനതയുമാണ്. ഒരു സത്യവിശ്വാസിയെ കുറിച്ച് പരദൂഷണം പറയുന്നതിലൂടെ ഏറ്റവും മോശമായ ഭക്ഷണമാണ് കഴിക്കുന്നതെന്നാണ് ഇബ്‌നു മസ്ഊദ്(റ) പറഞ്ഞിരിക്കുന്നത്. അതെ,പരദൂഷണത്തിലൂടെ മറ്റൊരാളുടെ പച്ചമാംസം കാര്‍ന്നുതിന്നുന്നു. കാരണം പരദൂഷകന്‍ അയാളുടെ മാന്യതയും സല്‍പ്പേരും അഭിമാനവും കടിച്ചുകീറുകയാണ് ചെയ്യുന്നത്. യഥാര്‍ത്ഥത്തില്‍ സംഹാരാത്മകമായ ഒരു കൂട്ടം അസുഖങ്ങള്‍ തുറന്നുവിടുന്ന ആപത്താണ് പരദൂഷണം. അപകീര്‍ത്തിയും അപവാദവും വെറുപ്പും വിദ്വേഷവും ശത്രുതയും നുണപ്രചാരണങ്ങളുമെല്ലാം പരദൂഷണത്തിന്റെ തുടര്‍ച്ചകളാണ്. എന്താണ് പരദൂഷണം? നബി (സ്വ) വിവരിച്ചിട്ടുണ്ട്: നിന്റെ സഹോദരനെ കുറിച്ച് അവന്‍ വെറുക്കുന്നത് പറയലാണ് പരദൂഷണം. അപ്പോള്‍ ആരോ ചോദിച്ചു: എന്നാല്‍ ആ പറയുന്ന കാര്യം ആ സഹോദരനില്‍ ഉള്ളതാണെങ്കിലോ?! അപ്പോള്‍ നബി (സ്വ) പറഞ്ഞു: ഉള്ള കാര്യം പറഞ്ഞതാണെങ്കില്‍ പരദൂഷണമാണ്. ഇനി ഇല്ലാത്ത കാര്യം പറഞ്ഞതാണെങ്കില്‍ അത് കളവുമാണ്. (ഹദീസ്-മുസ്്‌ലിം 2589).
പരദൂഷണത്തിന്റെ കാര്യത്തില്‍ അല്ലാഹു തന്നെ താക്കീത് ചെയ്തതാണ്. നിങ്ങള്‍ പരദൂഷണം പറയരുത്. സ്വന്തം സഹോദരന്റെ മൃതദേഹം ഭക്ഷിക്കാന്‍ നിങ്ങളാരെങ്കിലും ഇഷ്ടപ്പെടുമോ. അത് നിങ്ങള്‍ വെറുക്കുകയാണുണ്ടാവുക (സൂറത്തുല്‍ ഹുജറാത്ത് 12). സ്വന്തം സഹോദരന്റെ മാംസം ഭക്ഷിക്കുന്ന കണക്കെയുള്ള പരദൂഷണം വളരെ മ്ലേച്ഛമായ പ്രവൃത്തി തന്നെ. വ്യക്തികളെയോ കുടുംബങ്ങളെയോ സമൂഹങ്ങളെയോ പരദൂഷണം പറഞ്ഞ കാരണത്താല്‍ എത്രയെത്ര ബന്ധങ്ങളാണ് തകര്‍ന്നിട്ടുള്ളത്. തൊഴിലിടങ്ങളിലെ സഹപ്രവര്‍ത്തകരെപ്പറ്റിയുള്ള പരദൂഷണം ഭിന്നതകളും അസ്വസ്ഥതകളും ഉണ്ടാക്കുന്നു. പരദൂഷണത്തില്‍ നിന്ന് വിട്ടുനില്‍ക്കാനുള്ള എളുപ്പവഴി ദൈവസ്മരണ തന്നെയാണ്. എല്ലാം അല്ലാഹു കാണുന്നുണ്ടെന്നും അവന്‍ നിരീക്ഷിക്കുന്നുണ്ടെന്നുമുള്ള ബോധം സ്വന്തത്തില്‍ ഉണ്ടാകണം. ‘ഏതൊരു വാക്ക് ഉച്ചരിക്കുമ്പോഴും അവന്റെയടുത്ത് രേഖപ്പെടുത്താനൊരുങ്ങിയ നിരീക്ഷകനുണ്ടാകാതിരിക്കില്ല’ (സൂറത്തു ഖാഫ് 18). ചിലപ്പോള്‍ മറ്റുള്ളവരെ കുറിച്ച് നാം ശ്രദ്ധിക്കാതോ പറയുന്ന വാക്കുകള്‍ മഹാ അപകടങ്ങളാണ് വിളിച്ചുവരുത്തുന്നത്. ഒരിക്കല്‍ പ്രചാവക പത്‌നിമാരില്‍ ഒരാള്‍ സ്വന്തം സഹോദരിയുടെ നീളക്കുറവിനെ കുറിച്ച് സൂചിപ്പിച്ചപ്പോള്‍ ഇതുകേട്ട നബി(സ്വ) ഉടന്‍ പ്രതികരിച്ചു: നീ പറഞ്ഞ ഈ വാക്ക് കടല്‍വെള്ളത്തില്‍ കലക്കിയാല്‍ ആ വെള്ളം മൊത്തം മലിനമാക്കുന്നത്ര ഭയാനകമാണ് (ഹദീസ്-അബൂദാവൂദ് 4875). മറ്റൊരാളുടെ മനസ്ഥിതി അറിയുക എന്നതാണ് പരദൂഷണത്തില്‍ നിന്ന് വിട്ടുനില്‍ക്കാനുള്ള മറ്റൊരു മാര്‍ഗം. താന്‍ പരദൂഷണം പറഞ്ഞ കാരണത്താല്‍ മറ്റൊരാള്‍ക്ക് ഉണ്ടാവുന്ന വേദനയും യാതനയും മനസിലാക്കുക. ചിലപ്പോള്‍ അത് അയാളുടെ ജീവിതം തന്നെ വഴിമുട്ടിച്ചേക്കാം. ആ സ്ഥാനത്ത് നമ്മളാണെന്ന് ആലോചിച്ചു നോക്കുക. നമ്മളത് തീരെ ഇഷ്ടപ്പെടുകയില്ല.
ഇബ്‌നു അബ്ബാസ് (റ) പറയുന്നു: സഹോദരനെ കുറിച്ച് അയാളുടെ അസാന്നിധ്യത്തില്‍ നിങ്ങള്‍ സ്വന്തം പറയപ്പെടാന്‍ ആഗ്രഹിക്കുന്ന നല്ല കാര്യം മാത്രം പറയുക, ആഗ്രഹിക്കാത്തത് ഒഴിവാക്കുകയും ചെയ്യുക. ഒരു സദസില്‍ പരദൂഷണം പറയപ്പെടുകയാണെങ്കില്‍ അതില്‍ പങ്കാളിയാവരുത്, വിട്ടുനില്‍ക്കുക. ചീത്തയോട് ചേര്‍ന്നാല്‍ നാമും ചീത്തയാവും, നാമ്മളും അവരും സമന്മാരാകും. മറ്റൊരാളുടെ ആത്മാഭിമാനം പിച്ചിച്ചീന്തരുത്. മറ്റൊരാളുടെ അഭിമാനം സംരക്ഷിച്ചാല്‍ അന്ത്യനാളില്‍ അല്ലാഹു അയാളുടെ മുഖത്തെ നരകാഗ്നിയില്‍ നിന്ന് കാത്തുസംരക്ഷിക്കുമെന്നാണ് നബി (സ്വ) പറഞ്ഞിരിക്കുന്നത് (ഹദീസ് തുര്‍മുദി 1931). നമ്മള്‍ ഒരാളെ കുറിച്ച് പരദൂഷണം പറയുകയും അത് മറ്റൊരാള്‍ വഴി അയാള്‍ അറിയുകയും ചെയ്താല്‍ അയാളോട് മാപ്പ് ചോദിക്കണം. അല്ലെങ്കില്‍ അയാള്‍ക്ക് വേണ്ടിയും സ്വന്തത്തിന് വേണ്ടിയും അല്ലാഹുവിനോട് പശ്ചാത്താപം ചെയ്യണം. മാത്രമല്ല പരദൂഷണം പറഞ്ഞത്ര തന്നെ അയാളെപ്പറ്റി നല്ല കാര്യങ്ങളും പറയണം. പരദൂഷണം ഒരിക്കലും ഉണ്ടാവില്ലെന്ന് നമുക്ക് പ്രതിജ്ഞ ചെയ്യാം.