ഈദ് അവധി ദിവസങ്ങളില്‍ ദുബൈയില്‍ 222 യാചകര്‍ പിടിയില്‍
Fri, 04 Apr 2025
ഹവ്വയും ഖദീജയും ഇനി രണ്ടായി ജീവിക്കും
റിയാദ്: സയാമിസ് ഇരട്ടകളായ ഹവ്വയും ഖദീജയും ഇനി രണ്ടായി ജീവിക്കും. പശ്ചിമ ആഫ്രിക്കന്‍ രാജ്യമായ ബുര്‍കിനാഫാസോയില്‍ നിന്നുള്ള സയാമിസ് ഇരട്ടകളായ ഹവ്വയുടെയും ഖദീജയുടെയും വേര്‍പ്പെടുത്തല്‍ ശസ്ത്രക്രിയ ഇന്നലെ റിയാദില്‍ വിജയകരമായി പൂര്‍ത്തിയായി. തിരുഗേഹങ്ങളുടെ സേവകന്‍ സല്‍മാന്‍ രാജാവിന്റെയും കിരീടാവകാശിയും പ്രധാനമന്ത്രിയുമായ മുഹമ്മദ് ബിന്‍ സല്‍മാന്‍ രാജകുമാരന്റെയും നിര്‍ദേശാനുസരണം നടന്ന ശസ്ത്രക്രിയയിലൂടെ ഹവ്വയും ഖദീജയും ഇനി രണ്ട് വ്യക്തികളായി തന്നെ ജീവിത യാത്ര തുടങ്ങും.നാഷണല്‍ ഗാര്‍ഡ് മന്ത്രാലയത്തിനു കീഴിലുള്ള കിങ് അബ്ദുല്‍ അസീസ് മെഡിക്കല്‍ സിറ്റിയിലെ കിങ് അബ്ദുല്ല ചില്‍ഡ്രന്‍സ് സ്‌പെഷ്യലിസ്റ്റ് ആശുപത്രിയിലാണ് ശസ്ത്രക്രിയ നടന്നത്.
ഇന്നലെ രാവിലെയാണ് 17 മാസം പ്രായമുള്ള കുട്ടികളെ ശസ്ത്രക്രിയക്ക് വിധേയമാക്കിയത്. കിംഗ് സല്‍മാന്‍ ഹ്യുമാനിറ്റേറിയന്‍ എയ്ഡ് ആന്റ് റിലീഫ് സെന്റര്‍ സൂപ്പര്‍വൈസര്‍ ജനറലും സഊദിയില്‍ സയാമിസ് ഇരട്ടകള്‍ക്ക് വേര്‍പ്പെടുത്തല്‍ ശസ്ത്രിയകള്‍ നടത്തുന്ന മെഡിക്കല്‍ സംഘത്തിന്റെ തലവനുമായ ഡോ.അബ്ദുല്ല അല്‍ റബീഅയാണ് നേതൃത്വം നല്‍കിയത്. ഇക്കഴിഞ്ഞ ജൂലൈ ആദ്യത്തിലാണ് നെഞ്ചിന്റെ അടിഭാഗവും വയറും ഒട്ടിപ്പിടിച്ച നിലയിലുള്ള കുട്ടികളെ റിയാദിലെത്തിച്ചത്. ഡോ.അബ്ദുല്ല അല്‍ റബീഅയുടെ നേതൃത്വത്തില്‍ ഇരുവരെയും വേര്‍പ്പെടുത്തുന്നതിനുള്ള സാധ്യതകള്‍ പഠിക്കുകയും പരിശോധനകള്‍ നടത്തുകയും ചെയ്തു. കുട്ടികളുടെ ഹൃദയഭിത്തിയും കരളും കുടലും പങ്കിടുന്നതായി സൂക്ഷ്മ പരിശോധനകളില്‍ വ്യക്തമായതായി ഡോ. അബ്ദുല്ല അല്‍ റബീഅ പറഞ്ഞു. ശരീരത്തിന്റെ വലിയ ഭാഗം ഒട്ടിപ്പിടിച്ചത് കാരണം വേര്‍പ്പെടുത്തലിനു ശേഷമുള്ള വിടവ് അടക്കുന്നതിന് വേണ്ടി ബലൂണുകള്‍ തിരുകിക്കൊണ്ട് പ്ലാസ്റ്റിക് സര്‍ജറിയും നടന്നതായും അദ്ദേഹം പറഞ്ഞു. അഞ്ചു ഘട്ടങ്ങളായി നടക്കുന്ന ശസ്ത്രക്രിയയില്‍ കണ്‍സള്‍ട്ടന്റുമാരും സ്‌പെഷ്യലിസ്റ്റുകളും നഴ്‌സുമാരും ടെക്‌നീഷ്യന്മാരും അടക്കം 26
അംഗ മെഡിക്കല്‍ സംഘമാണ് പങ്കെടുത്തത്. സയാമിസ് ഇരട്ടകള്‍ക്ക് വേണ്ടി തിരുഗേഹങ്ങളുടെ സേവകന്‍ സല്‍മാന്‍ രാജാവിന്റെയും കിരീടാവകാശിയും പ്രധാനമന്ത്രിയുമായ മുഹമ്മദ് ബിന്‍ സല്‍മാന്‍ രാജകുമാരന്റെയും രക്ഷാകര്‍തൃത്വത്തില്‍ സഊദി അറേബ്യയില്‍ നടക്കുന്ന 62ാമത്തെ ശസ്ത്രക്രിയയാണിത്. മുപ്പത്തിയഞ്ചു വര്‍ഷത്തിനിടെ വേര്‍പ്പെടുത്തല്‍ ശസ്ത്രക്രിയക്കുള്ള സാധ്യതകള്‍ പഠിക്കാനും വിദഗ്ധ ചികിത്സക്കുമായി 27 രാജ്യങ്ങളില്‍ നിന്നായി 146 സയാമിസ് ഇരട്ടകളെ ഇതുവരെ രാജ്യത്തെത്തിച്ചു പരിചരണങ്ങള്‍ നല്‍കിയതായി ഡോ.റബീഅ വ്യക്തമാക്കി.
