ആഗോള ഊര്‍ജ സുരക്ഷ ശക്തിപ്പെടുത്താന്‍ യുഎഇ പ്രതിജ്ഞാബദ്ധം: ശൈഖ് മുഹമ്മദ്
Sat, 12 Apr 2025
അബുദാബി : ഇന്ത്യന്‍ ഇസ്‌ലാമിക് സെന്റര്‍ സംഘടിപ്പിക്കുന്ന ലിറ്ററേച്ചര്‍ ഫെസ്റ്റ് ജനുവരി 18,19 തിയ്യതികളില്‍ നടക്കുമെന്ന് സംഘാടകര്‍ വാര്‍ത്താ സമ്മേളനത്തില്‍ പറഞ്ഞു. ലിറ്ററേച്ചര്‍ ഫെസ്റ്റിന്റെ ഭാഗമായി നല്‍കിവരുന്ന സാഹിത്യ അവാര്‍ഡിന് ഇത്തവണ കഥാകൃത്ത് ശിഹാബുദ്ദീന്‍ പൊയ്ത്തുംകടവ് അര്‍ഹനായതായും ഭാരവാഹികള്‍ അറിയിച്ചു. ഫെസ്റ്റിനോടനുബന്ധിച്ച് മഹാകവി പുലിക്കോട്ടില്‍ ഹൈദറിന്റെ അമ്പതാം ചരമവാര്‍ഷിക ആചരണവും നടക്കും. മോയിന്‍കുട്ടി വൈദ്യര്‍ക്കു ശേഷം മലയാള സാഹിത്യത്തിലെ സവിശേഷ പാരമ്പര്യത്തെ നയിച്ച ജനകീയനായ കവിയാണ് പുലിക്കോട്ടില്‍ ഹൈദര്‍. സാധാരണക്കാരായ മനുഷ്യരും അവരുടെ ജീവിതവും ദുരിതവും ഇന്ത്യന്‍ സ്വാതന്ത്യസമരവും ജയിലനുഭവങ്ങളും യാതനകളും പുലിക്കോട്ടില്‍ കൃതികളിലൂടെ ഇന്നും മലയാളം കേട്ടറിയുന്നു. പുലിക്കോട്ടില്‍ ഹൈദര്‍ ജന്മശതാബ്ദി ആഘോഷത്തിനു ശേഷം ഇതാദ്യമായി പ്രവാസ ലോകത്ത് നടക്കുന്ന ഏറ്റവും ഉചിതമായ അനുസ്മരണ പരിപാടിയാക്കിയിരിക്കും ഇതെന്നും സംഘാടകര്‍ പറഞ്ഞു.മാപ്പിള ഹെറിറ്റേജ് ലൈബ്രറി തയാറാക്കിയ അറബി മലയാളം ബിബ്ലിയോഗ്രഫി പ്രകാശനവും ലിറ്ററേച്ചര്‍ ഫെസ്റ്റില്‍ നടക്കും. മാപ്പിള മലയാളം, അറബി മലയാളം എന്നിങ്ങനെ അറിയപ്പെടുന്ന മലയാളത്തിന്റെ കൈവഴികളിലൊന്നിന്റെ സമഗ്രമായ ചരിത്രരേഖയായാണ് ബിബ്ലിയോഗ്രഫി രചിച്ചിരിക്കുന്നത്. കോഴിക്കോട് സര്‍വകലാശാലയിലെ സിഎച്ച് ചെയറിന്റെ അനുബന്ധമായി ഭാഷാസാഹിത്യ സംരക്ഷണ രംഗത്ത് വലിയ സേവനങ്ങള്‍ അര്‍പ്പിക്കുന്ന മാപ്പിള ഹെറിറ്റേജ് ലൈബ്രറിയാണ് ഉദ്യമം പൂര്‍ത്തീകരിക്കുന്നത്. പ്രകാശന പരിപാടിയില്‍ ചരിത്രകാരനും ഗ്രന്ഥകാരനുമായ അബ്ദുറഹ്മാന്‍ മങ്ങാട് പങ്കെടുക്കും. ഈയിടെ വിടപറഞ്ഞ മലയാളത്തിന്റെ സുകൃതം എംടി വാസുദേവന്‍ നായര്‍ അനുസ്മരണം സമപാന ദിവസം നടക്കും.
രണ്ടു ദിവസം വിവിധ സെഷനുകളിലായി വിദ്യാര്‍ത്ഥികളുടെ സാഹിത്യ സംവാദം,ഷോര്‍ട് ഫിലിം ഫെസ്റ്റ്, സഞ്ചാരികളും വ്‌ളോഗര്‍മാരും പങ്കെടുക്കുന്ന ട്രാവലോഗ്,പ്രവാസ ലോകത്തെ മുതിര്‍ന്ന പൗരന്മാന്മാരുടെ കൂടിയിരിപ്പ്,കഥാ കവിതാ അരങ്ങുകള്‍, പുസ്തക പ്രകാശനങ്ങള്‍, സാഹിത്യ,സാംസ്‌കാരിക സംവാദങ്ങള്‍,എഴുത്തുകാര്‍ക്ക് ആദരവ്,പുസ്തക പ്രകാശനങ്ങള്‍ തുടങ്ങി വിവിധ സെഷനുകളും സംഘടിപ്പിക്കും. നാട്ടിലും യുഎഇയിലുമുള്ള എഴുത്തുകാരും കവികളും സാംസ്‌കാരിക പ്രമുഖരും വിവിധ സെഷനുകളില്‍ പങ്കെടുക്കും. വാര്‍ത്താ സമ്മേളനത്തില്‍ ഇസ്‌ലാമിക് സെന്റര്‍ ജനറല്‍ സെക്രട്ടറി ടി.ഹിദായത്തുല്ല പറപ്പൂര്‍,വൈസ് പ്രസിഡന്റ് യു.അബ്ദുല്ല ഫാറൂഖി, ട്രഷറര്‍ ബിസി അബൂബക്കര്‍,ലിറ്ററേച്ചര്‍ സെക്രട്ടറി ജാഫര്‍ കുറ്റിക്കോട്,പബ്ലിക് റിലേഷന്‍ സെക്രട്ടറി അഡ്വ. ഷറഫുദ്ദീന്‍,അബുദാബി കെഎംസിസി സെക്രട്ടറി ഷാനവാസ് പുളിക്കല്‍, ജുബൈര്‍ വെള്ളാടത്ത്,അലി ചിറ്റയില്‍ പങ്കെടുത്തു.
