അബുദാബി : അബുദാബി കാര്‍ഷിക ഭക്ഷ്യസുരക്ഷ അതോറിറ്റിക്ക് വിവിധ മേഖലകളില്‍ നിന്നുള്ള 21 രാജ്യാന്തര അവാര്‍ഡുകള്‍ ലഭിച്ചു.
ഭക്ഷ്യ ഇറക്കുമതി കയറ്റുമതി പ്ലാറ്റ്‌ഫോമിന്റെ നവീകരണത്തിലും നടപ്പാക്കലിലും മികവ് പുലര്‍ത്തിയതിന് ബിസിനസ് വിഭാഗത്തില്‍ ഐക്യരാഷ്ട്രസഭയുടെ ഇന്റര്‍നാഷണല്‍ ടെലികമ്മ്യൂണിക്കേഷന്‍ യൂണിയന്‍ സംരംഭമായ വേള്‍ഡ് സമ്മിറ്റ് ഓണ്‍ ഇന്‍ഫര്‍മേഷന്‍ സൊസൈറ്റി അവാര്‍ഡ് അഗ്രികള്‍ച്ചര്‍ ആന്‍ഡ് ഫുഡ് സേഫ്റ്റി അതോറിറ്റി കരസ്ഥമാക്കി. ഇറക്കുമതിക്കാര്‍ക്കും കയറ്റുമതിക്കാര്‍ക്കും അവരുടെ ഓര്‍ഡറുകള്‍ സമര്‍പ്പിക്കാനും ട്രാക്ക് ചെയ്യാനുമുള്ള ഒരു ഏകജാലകമാണിത്. കൂടാതെ അബുദാബി തുറമുഖങ്ങള്‍ വഴിയുള്ള ഇറക്കുമതിയുടെ ആകര്‍ഷണീയത വര്‍ദ്ധിപ്പിക്കുന്നതിനും ഭക്ഷ്യ വ്യാപാരം സുഗമമാക്കുന്നതിനും സംഭാവന ചെയ്യുന്ന ഇറക്കുമതി ചെയ്ത ഭക്ഷ്യ ഉല്‍പന്നങ്ങള്‍ക്കുള്ള നടപടിക്രമങ്ങള്‍ സുഗമമാക്കുകയും ചെയ്യുന്നു. പ്രോജക്റ്റിന് ഗ്ലോബി ഇന്റര്‍നാഷണല്‍ ബിസിനസ് അവാര്‍ഡും ലഭിച്ചു. അബുദാബിയിലെ കാര്‍ഷിക മേഖലയിലെ ജല പുനരുപയോഗത്തിനും പാരമ്പര്യേതര ജലസ്രോതസ്സുകള്‍ വിപുലീകരിക്കുന്നതിനുമുള്ള നൂതന പദ്ധതിക്ക് ഇന്റര്‍നാഷണല്‍ ഡീസലിനേഷന്‍ ആന്‍ഡ് റീയൂസ് അസോസിയേഷന്റെ വാട്ടര്‍ പോസിറ്റീവ് അച്ചീവ്‌മെന്റ് അവാര്‍ഡ് അഡാഫ്‌സയ്ക്ക് ലഭിച്ചു. ജലസേചനത്തിനായി റീസൈക്കിള്‍ ചെയ്ത ജലത്തിന്റെ ഉപയോഗം വ്യാപകമാക്കുന്നതിനുള്ള പദ്ധതിയുടെ ഭാഗമായി അബുദാബിയിലെ 1,600ലധികം ഫാമുകളില്‍ റീസൈക്കിള്‍ ചെയ്ത വെള്ളം നല്‍കാന്‍ കഴിഞ്ഞു.
അഡാഫ്‌സയുടെ ആഗോള നേതൃത്വത്തെ ശക്തിപ്പെടുത്തിക്കൊണ്ട്, യുണൈറ്റഡ് നേഷന്‍സ് ഡെവലപ്‌മെന്റ് പ്രോഗ്രാമും ഇന്റര്‍നാഷണല്‍ ടെലികമ്മ്യൂണിക്കേഷന്‍ യൂണിയനും സംഘടിപ്പിച്ച ഡിജിറ്റല്‍ ഗെയിം ചേഞ്ചേഴ്‌സ് അവാര്‍ഡിലെ മികച്ച 20 ആഗോള പ്രോജക്റ്റുകളുടെ പട്ടികയില്‍ സാദ്‌ന റേറ്റിംഗ് പ്രോജക്റ്റ് തിരഞ്ഞെടുക്കപ്പെട്ടു. കാര്‍ഷിക സാങ്കേതികവിദ്യയിലെ മികവ്, നൂതനാശയങ്ങള്‍ പ്രദര്‍ശിപ്പിക്കല്‍, സഹകരണം വളര്‍ത്തല്‍ എന്നിവയിലെ മികവ് പ്രകടമാക്കുന്ന ആഗോള പ്ലാറ്റ്‌ഫോമായ അഗ്രിനെക്സ്റ്റ് അവാര്‍ഡും അഡാഫ്‌സയ്ക്ക് ലഭിച്ചു.
