അബുദാബി : ഇസ്രാഈല്‍ ആക്രമണത്തില്‍ ദുരിതം പേറുന്ന ഗസ്സയിലെ പിഞ്ചുമക്കള്‍ക്ക് പോളിയോ വാക്‌സിന്‍ നല്‍കാന്‍ യുഎഇ പദ്ധതി. പോളിയോ വൈറസ് വീണ്ടും ഉയര്‍ന്നുവന്നതിനെത്തുടര്‍ന്ന് ഗാസയില്‍ പോളിയോയ്‌ക്കെതിരായ അടിയന്തര വാക്‌സിനേഷന്‍ കാമ്പയിന്‍ അനിവാര്യമായിരിക്കുകയാണ്. ഇതിനെ പിന്തുണയ്ക്കാന്‍ യുഎഇ പ്രസിഡന്റ് ശൈഖ് മുഹമ്മദ് ബിന്‍ സായിദ് അല്‍നഹ്യാന്‍ 5 മില്യണ്‍ ഡോളര്‍ അനുവദിക്കാന്‍ നിര്‍ദ്ദേശിച്ചു. ഫലസ്തീനികള്‍ അനുഭവിക്കുന്ന ഗുരുതരമായ മാനുഷിക പ്രതിസന്ധിക്ക് പരിഹാരമായി, പ്രത്യേകിച്ച് കുട്ടികള്‍ക്ക് ആശ്വാസം നല്‍കുന്നതിനുള്ള യുഎഇയുടെ നിരന്തര ശ്രമങ്ങളുടെ ഭാഗമാണ് ധനസഹായം. ലോകാരോഗ്യ സംഘടന ആഗസ്റ്റ് 23ന് ഗസ്സയില്‍ ഒരു കുട്ടിക്കെങ്കിലും ടൈപ്പ് 2 പോളിയോ വൈറസ് ബാധിച്ചതായി സ്ഥിരീകരിച്ചിരുന്നു. ഇത് 25 വര്‍ഷത്തിനിടെ ഈ പ്രദേശത്ത് ആദ്യമായിട്ടാണ്. ലോകാരോഗ്യ സംഘടന, യുണിസെഫ്, ആണ്‍റോ എന്നിവയുടെ സഹകരണത്തോടെ നടത്തുന്ന കാമ്പയിന്‍, വൈറസ് പടരുന്നത് തടയാനും രോഗം പടരുന്നത് തടയാനും ഗസ്സയിലെ 10 വയസ്സിന് താഴെയുള്ള 640,000ത്തിലധികം കുട്ടികള്‍ക്ക് രണ്ട് ഡോസ് പോളിയോ വാക്‌സിന്‍ നല്‍കും. കാമ്പയിന്‍ സെപ്റ്റംബര്‍ 1, ഞായറാഴ്ച മധ്യ ഗാസയില്‍ തുടങ്ങി തെക്കിലേക്കും പിന്നീട് വടക്കന്‍ ഗാസയിലേക്കും നീങ്ങും. കുട്ടികള്‍ക്കും കുടുംബങ്ങള്‍ക്കും ആരോഗ്യ സൗകര്യങ്ങള്‍ ലഭ്യമാക്കാനും കമ്മ്യൂണിറ്റി പ്രവര്‍ത്തകരെ കുട്ടികളിലേക്ക് എത്തിക്കാനും പ്രാപ്തമാക്കുന്നതിന്, ഓരോ ഘട്ടവും ഇടവേളകളില്‍ മൂന്ന് ദിവസം തുടരും. കാമ്പയിന്‍ ഫലപ്രദമായി നടത്താന്‍ ഏകദേശം 1.26 ദശലക്ഷം പോളിയോ വാക്‌സിന്‍ ഗാസയില്‍ എത്തിച്ചിട്ടുണ്ട്. 400,000 ഡോസുകള്‍ ഉടന്‍ എത്തും. മൊബൈല്‍ ടീമുകള്‍ ഉള്‍പ്പെടെ 2,100ലധികം ആരോഗ്യ പ്രവര്‍ത്തകര്‍ കാമ്പയിനിന്റെ രണ്ട് റൗണ്ടുകളും ഡെലിവറിക്ക് പിന്തുണ നല്‍കും.
