അബുദാബി : തൊഴിലാളികളെ വഞ്ചിക്കുകയും സര്‍ക്കാരിനെ കബളിപ്പിക്കുകയും ചെയ്യുന്ന കമ്പനികള്‍ക്കും തൊഴിലുടമകള്‍ക്കും കനത്ത പിഴ ഈടാക്കുമെന്ന് യുഎഇ തൊഴില്‍ മന്ത്രാലയം. യുഎഇ ലേബര്‍ ലോ-എന്നറിയപ്പെടുന്ന തൊഴില്‍ ബന്ധത്തിന്റെ നിയന്ത്രണവുമായി ബന്ധപ്പെട്ട ഫെഡറല്‍ ഡിക്രിനിയമത്തിലെ നിര്‍ദ്ദിഷ്ട വ്യവസ്ഥകള്‍ ഭേദഗതി ചെയ്തുകൊണ്ട് യുഎഇ ഗവണ്‍മെന്റ് ഒരു ഫെഡറല്‍ ഭേദഗതി പുറത്തിറക്കി. തൊഴില്‍ വിപണിയുടെ കാര്യക്ഷമതയും മത്സരക്ഷമതയും ഉറപ്പാക്കുക, തൊഴില്‍ ബന്ധങ്ങള്‍ നിയന്ത്രിക്കുക, ഉള്‍പ്പെട്ടിരിക്കുന്ന എല്ലാ കക്ഷികളുടെയും അവകാശങ്ങളും കടമകളും വ്യക്തമായി നിര്‍വചിക്കുക, നിയമപ്രകാരം അവരുടെ സംരക്ഷണം ഉറപ്പാക്കുക എന്നിവയാണ് ഇത് ലക്ഷ്യമിടുന്നത്. ശരിയായ പെര്‍മിറ്റ് ഇല്ലാതെ തൊഴിലാളികളെ ജോലിക്കെടുക്കുകയോ തൊഴിലാളികളെ നിയമിക്കുകയോ അവരെ രാജ്യത്തേക്ക് കൊണ്ടുവരികയോ അവര്‍ക്ക് ജോലി നല്‍കുന്നതില്‍ പരാജയപ്പെടുകയോ വര്‍ക്ക് പെര്‍മിറ്റുകള്‍ ദുരുപയോഗം ചെയ്യുകയോ ചെയ്യുന്ന ഏതൊരു തൊഴിലുടമയ്ക്കും 100,000 ദിര്‍ഹത്തില്‍ കുറയാത്തതും ഒരു മില്യണ്‍ ദിര്‍ഹത്തില്‍ കൂടാത്തതുമായ പിഴ ചുമത്തുന്നതാണ് ഉത്തരവ്. പുതിയ ഡിക്രിയുടെയും അതിന്റെ എക്‌സിക്യൂട്ടീവ് റെഗുലേഷനുകളുടെയും ലംഘനമായി, തൊഴിലാളികളുടെ അവകാശങ്ങള്‍ പരിഹരിക്കാതെ ഒരു ബിസിനസ്സ് അടച്ചുപൂട്ടുകയോ അതിന്റെ പ്രവര്‍ത്തനങ്ങള്‍ താല്‍ക്കാലികമായി നിര്‍ത്തുകയോ ചെയ്യുന്നവര്‍ക്കും ഈ പിഴ ബാധകമാണ്. പ്രായപൂര്‍ത്തിയാകാത്തവരെ നിയമവിരുദ്ധമായി ജോലിക്കെടുക്കുന്നതും പ്രായപൂര്‍ത്തിയാകാത്തവരെ അവരുടെ രക്ഷിതാക്കള്‍ നിയമം ലംഘിച്ച് ജോലി ചെയ്യാന്‍ വിടുന്നതും ഇതേ പിഴകള്‍ ബാധകമാണ്. സ്വദേശിവത്കരണം നടപ്പാക്കിയെന്ന് ബോധ്യപ്പെടുത്താനായി സാങ്കല്‍പിക റിക്രൂട്ട്‌മെന്റ് നടത്തി സര്‍ക്കാരിനെ കബളിപ്പിക്കുന്നവര്‍ക്കും ഇതേ പിഴ ഈടാക്കും.
തൊഴില്‍ തര്‍ക്കങ്ങളുടെ കാര്യത്തിലും, തര്‍ക്കം പരിഹരിക്കാന്‍ മാനവ വിഭവശേഷി, എമിറേറ്റൈസേഷന്‍ മന്ത്രാലയം പുറപ്പെടുവിച്ച തീരുമാനത്തില്‍ വിയോജിപ്പുണ്ടെങ്കില്‍, കേസ് കോടതിക്ക് പകരം ഫസ്റ്റ് ഇന്‍സ്റ്റന്‍സ് കോടതിയില്‍ കൊണ്ടുവരുമെന്ന് ഭേദഗതികള്‍ പറയുന്നു.
