സൗദി അറേബ്യയില്‍ വാഹനാപകടത്തില്‍ മലയാളി ഉള്‍പ്പെടെ രണ്ട് പേര്‍ മരിച്ചു
Sat, 19 Apr 2025
ഈജിപ്ത്-ഗസ്സ അതിര്‍ത്തിയിലുള്ള അല്‍ ആരിഷ് ആശുപത്രിയിലെ കളിസ്ഥലമാണ് രാഷ്ട്രനേതാക്കള്‍ സന്ദര്‍ശിച്ചത്
അല്‍ ആരിഷ് (ഈജിപ്ത്): ഗസ്സയില്‍ നിന്നുള്ള കുട്ടികള്‍ക്കായി ബുര്‍ജീല്‍ ഹോള്‍ഡിങ്‌സ് ഒരുക്കിയ വിനോദ സ്ഥലം രാഷ്ട്ര തലവന്മാര്‍ സന്ദര്‍ശിച്ചു. ഈജിപ്ത്-ഗസ്സ അതിര്‍ത്തിയിലെ അല്‍ ആരിഷ് ആശുപത്രിയിലെ കളി സ്ഥലം സന്ദര്‍ശിച്ചാണ് ഈജിപ്ത്,ഫ്രഞ്ച് പ്രസിഡന്റുമാര്‍ കുട്ടികളോട് കുശലാന്വേഷണം നടത്തിയത്. കുട്ടികളുടെ കളി സ്ഥലത്തേക്ക് രാഷ്ട്രത്തലവന്മാര്‍ എത്തുക പതിവല്ല. അതുകൊണ്ടു തന്നെ ഏറെ സവിശേഷമായ സന്ദര്‍ശനത്തിനാണ് ഈജിപ്ത്-ഗസ്സ അതിര്‍ത്തിയിലെ അല്‍ ആരിഷ് ആശുപത്രി കഴിഞ്ഞ ദിവസം സാക്ഷ്യം വഹിച്ചത്. ഫ്രഞ്ച് പ്രസിഡന്റ് ഇമ്മാനുവല്‍ മാക്രോണിന്റെ ഈജിപ്ത് സന്ദര്‍ശനത്തിന്റെ ഭാഗമായാണ് മാക്രോണും ഈജിപ്ത് പ്രസിഡന്റ് അബ്ദുല്‍ ഫത്താഹ് എല്‍സിസിയും അല്‍ ആരിഷ് ഹോസ്പിറ്റലിലെ വെല്‍നസ് ഒയാസിസ് സന്ദര്‍ശിച്ചത്.
ഗസ്സയിലെ ആക്രമണത്തില്‍ പരിക്കേറ്റ കുട്ടികളുടെ ആരോഗ്യത്തിലേക്കുള്ള തിരിച്ചുവരവിനെ പിന്തുണയ്ക്കുന്നതിനായി അബുദാബി ആസ്ഥാനമായ ബുര്‍ജീല്‍ ഹോള്‍ഡിങ്‌സ് ഒരുക്കിയ കളിസ്ഥലത്തെത്തിയ രാഷ്ട്രനേതാക്കള്‍ കുട്ടികളുമായി സംസാരിച്ച് വിശേഷങ്ങള്‍ ചോദിച്ചറിഞ്ഞു. ചികിത്സയില്‍ കഴിയുന്ന അവരെ ആശ്വസിപ്പിച്ചു. കളിചിരികളുമായി കുട്ടികളും ഇരുവര്‍ക്കുമൊപ്പം ചേര്‍ന്നു. ഈജിപ്ത് അതിര്‍ത്തി വഴി ഗസ്സയില്‍ നിന്നെത്തിയ പരിക്കേറ്റവര്‍ക്ക് തുടക്കം മുതല്‍ ആശ്രയം അല്‍ ആരിഷ് ആശുപത്രിയാണ്.
പ്രപതിസന്ധിയിലായവര്‍ക്ക് സഹായമെത്തിക്കാനുള്ള ഇടപെടലുകളുടെ തുടര്‍ച്ചയായി കഴിഞ്ഞ വര്‍ഷമാണ് ആശുപത്രിയില്‍ ബുര്‍ജീല്‍ ഹോള്‍ഡിങ്‌സ് സ്ഥാപകനും ചെയര്‍മാനുമായ ഡോ.ഷംഷീര്‍ വയലിലിന്റെ നേതൃത്വത്തില്‍ പ്രത്യേക വിനോദ മേഖല സജ്ജീകരിച്ചത്. വിവിധ വിനോദോപാധികള്‍ ലഭ്യമാക്കിയിരിക്കുന്ന വെല്‍നസ് ഒയാസിസ് ആശുപത്രിയില്‍ എത്തുന്ന കുട്ടികളുടെ പ്രിയ കേന്ദ്രമാണ്. മാത്രമല്ല,എല്ലാ പ്രമുഖ സന്ദര്‍ശകര്‍ക്കും ഇത് ഒഴിച്ചു കൂടാനാവാത്ത ഇടമായി മാറി. രാഷ്ട്ര തലവന്മാരുടെ സന്ദര്‍ശനത്തിലൂടെ ഈ കളിസ്ഥലം അന്താരാഷ്ട്ര മാധ്യമശ്രദ്ധ നേടിയിരിക്കുകയാണ്.
