എഐഎം കോണ്‍ഗ്രസ് 7 മുതല്‍ 9 വരെ
Sat, 05 Apr 2025
എഴുത്തുകാരനും യുഎഇയിലെ കലാസാംസ്‌കാരിക ആത്മീയ രംഗങ്ങളിലെ സജീവസാന്നിധ്യവുമായിരുന്ന തൊടുപുഴ മലങ്കര എസ്‌റ്റേറ്റിലെ അശുപത്രി കവലയിലുള്ള മാമൂട്ടില്‍ പാടിയില്‍ ബിജു ജോസഫ് കുന്നുംപുറം (52) അന്തരിച്ചു. ഈ മാസം 6 ന് മസ്തിഷ്ഘാതത്തെ തുടര്‍ന്ന് അജ്മാനിലെ ശൈഖ് ഖലീഫ ആശുപത്രിയില്‍ വിദഗ്ധ ചികിത്സയിലായിരുന്നു. കഴിഞ്ഞ പത്ത് ദിവസങ്ങളിലായി വെന്റിലേറ്ററില്‍ തുടര്‍ന്ന ബിജു ജോസഫിന്റെ മസ്തിഷ്‌ക മരണം കഴിഞ്ഞദിവസം ഡോക്ടര്‍മാര്‍ സ്ഥിരീകരിച്ചു. മരണശേഷം തന്റെ അവയവങ്ങള്‍ ദാനം ചെയ്യണമെന്ന ബിജുവിന്റെ ആഗ്രഹ പ്രകാരം അതിനുള്ള നടപടികള്‍ പൂര്‍ത്തിയാക്കുകയും ചെയ്തു. ഭാര്യയും മകനും മകളുമടങ്ങുന്ന കുടുംബം വര്‍ഷങ്ങളായി അജ്മാനിലാണ് താമസം. ഷാര്‍ജ സെന്റ് മൈക്കിള്‍സ് കത്തോലിക്കാ ദേവാലയത്തിലെ വിവിധ ആത്മീയ പ്രവര്‍ത്തനങ്ങളില്‍ സജീവ സാന്നിധ്യമായിരുന്നു. പ്രവാസ ലോകത്തിലെ കലാ സാഹിത്യ രംഗങ്ങളില്‍ സജീവമായിരുന്ന ബിജു നോവലുകളടക്കം നാല് പുസ്തകങ്ങള്‍ എഴുതിയിട്ടുണ്ട്. ഷാര്‍ജാ രാജ്യാന്തര പുസ്തകമേളയിലെ നിറസാന്നിധ്യമായിരുന്ന അദ്ദേഹം വാദ്യമേളത്തിലും പ്രാഗത്ഭ്യം തെളിയിച്ചിട്ടുണ്ട്. ഷാര്‍ജ ഹംരിയ്യ ഫ്രീ സോണിലുള്ള സ്വകാര്യസ്ഥാപനത്തില്‍ അക്കൗണ്ട്‌സ് മാനേജരായിരുന്നു. പരേതനായ കുന്നുംപുറം പാപ്പനാണ് പിതാവ്. മാതാവ്: അന്നക്കുട്ടി. ഭാര്യ: ബിജി ജോസഫ്. മക്കള്‍: കാനഡയില്‍ പഠിക്കുന്ന ആഷിഖ് ബിജു, അനേന ബിജു. അബുദാബി ക്ലെവ് ലാന്‍ഡ് ആശുപത്രിയിലുള്ള മൃതദേഹം എംബാമിങ്ങിന് ശേഷം നാട്ടിലെത്തിച്ച് സംസ്‌കരിക്കുമെന്ന് ബന്ധുക്കള്‍ അറിയിച്ചു.
