അബുദാബി : മുന്‍കൂര്‍ അനുമതിയില്ലാതെ അവശ്യ സാധനങ്ങളുടെ വില വര്‍ധിപ്പിക്കാന്‍ പാടില്ലെന്ന് യുഎഇ സാമ്പത്തിക മന്ത്രാലയം അറിയിച്ചു. ജനുവരി മുതല്‍ അടിസ്ഥാന സാധനങ്ങളുടെ വിലവര്‍ദ്ധനകള്‍ക്കിടയില്‍ ആറ് മാസത്തെ കാലയളവ് വേണം. ഉപഭോക്താക്കളെ സംരക്ഷിക്കുന്നതിനും മത്സരം വര്‍ദ്ധിപ്പിക്കുന്നതിനുമായി മുന്‍കൂര്‍ അനുമതിയില്ലാതെ രാജ്യത്തെ ചില്ലറ വ്യാപാരികള്‍ക്ക് ഒമ്പത് അടിസ്ഥാന ഉപഭോക്തൃ ഉല്‍പ്പന്നങ്ങളുടെ വില വര്‍ദ്ധിപ്പിക്കാന്‍ കഴിയില്ലെന്നും മന്ത്രാലയം അറിയിച്ചു. പാചക എണ്ണ, മുട്ട, പാലുല്‍പ്പന്നങ്ങള്‍, അരി, പഞ്ചസാര, കോഴി, പയര്‍വര്‍ഗ്ഗങ്ങള്‍, റൊട്ടി, ഗോതമ്പ് എന്നിവ ഉള്‍പ്പെടുന്ന സാധനങ്ങളുടെ വില വര്‍ധനവില്‍ കര്‍ശനമായ നിയന്ത്രണമുണ്ട്. പുതിയ മാറ്റങ്ങള്‍ 2025 ജനുവരി 2 മുതല്‍ പ്രാബല്യത്തില്‍ വരും.
മന്ത്രാലയത്തിന്റെ പുതിയ ഉത്തരവുകള്‍ പ്രകാരം പ്രാദേശിക അധികാരികള്‍, അവശ്യ വസ്തുക്കളുടെ വിതരണക്കാര്‍, ചില്ലറ വ്യാപാരികള്‍, ഡിജിറ്റല്‍ വ്യാപാരികള്‍, യുഎഇയുടെ ഉപഭോക്താക്കള്‍ പുതിയ നയം നടപ്പാക്കേണ്ടതുണ്ട്. എല്ലാ കക്ഷികളും തീരുമാനങ്ങള്‍ പാലിക്കുന്നുണ്ടെന്ന് ഉറപ്പാക്കാന്‍ മന്ത്രാലയത്തിന് മേല്‍നോട്ട അധികാരം നല്‍കിയിട്ടുണ്ട്. സുതാര്യത ഉറപ്പാക്കുന്നതിന് റീട്ടെയില്‍ സ്‌റ്റോറുകള്‍ യൂണിറ്റ് വില പ്രദര്‍ശിപ്പിക്കേണ്ടതുണ്ട്. ഒമ്പത് അടിസ്ഥാന ഉപഭോക്തൃ വസ്തുക്കള്‍ക്ക് പുറമേ, മന്ത്രാലയത്തിന്റെ മുന്‍കൂര്‍ അനുമതിയോടെ മാത്രമേ വില ഉയര്‍ത്താനാകൂ, ക്ലീനിംഗ് ഉല്‍പന്നങ്ങളുടെ വിലയ്‌ക്കൊപ്പം അനുബന്ധ ഇനങ്ങളും ഈ ഉല്‍പ്പന്നങ്ങളില്‍ ഉള്‍പ്പെടുന്നുവെന്ന് സാമ്പത്തിക മന്ത്രാലയം അണ്ടര്‍ സെക്രട്ടറി അബ്ദുല്ല അഹമ്മദ് അല്‍ സാലിഹ് പറഞ്ഞു.
പുതിയ നയവും അതിന്റെ നിയന്ത്രണ തീരുമാനങ്ങളും യുഎഇയുടെ എല്ലാ എമിറേറ്റുകളിലുമുള്ള അവശ്യ ഉപഭോക്തൃ വസ്തുക്കളുടെ വിതരണവും ആവശ്യവും നിരീക്ഷിക്കും. നയം കുത്തക സമ്പ്രദായങ്ങളെ പരിമിതപ്പെടുത്തുകയും വിപണി സ്ഥിരതയും ഉത്പന്ന ഗുണനിലവാരവും നിലനിര്‍ത്തുകയും ചെയ്യും. വിതരണക്കാര്‍, ചില്ലറ വ്യാപാരികള്‍, ഓണ്‍ലൈന്‍ വ്യാപാരികള്‍ എന്നിവര്‍ക്കിടയില്‍ ഒരു സന്തുലിതാവസ്ഥ സ്ഥാപിക്കാനും ഇതുവഴി സാധ്യമാക്കും.
246ാം നമ്പര്‍ മന്ത്രിതല തീരുമാനം വില സ്ഥിരത നിലനിര്‍ത്താനും വിലകളിലെ ഏകപക്ഷീയമായ വര്‍ദ്ധനവ് തടയാനും ലക്ഷ്യമിടുന്നതായി അല്‍ സാലിഹ് വിശദീകരിച്ചു. മന്ത്രിതല തീരുമാനം ഉപഭോക്താക്കള്‍ക്കും വിതരണക്കാര്‍ക്കും ചില്ലറ വ്യാപാരികള്‍ക്കും പരാതി നല്‍കാനുള്ള അവകാശം നല്‍കുന്നു.
