ദുബൈ : ദാറുല്‍ ഹുദാ ഇസ്്‌ലാമിക് യൂണിവേഴ്‌സിറ്റി റൂബി ജൂബിലിയോടനുബന്ധിച്ച് 24ന് ദുബൈയില്‍ ഫീഡര്‍ കോണ്‍ഫറന്‍സ് സംഘടിപ്പിക്കും. ദുബൈ അല്‍ ഖിസൈസ് വുഡ്‌ലം പാര്‍ക്ക് സ്‌കൂള്‍ ഹാളിലാണ് പരിപാടി. രാവിലെ നടക്കുന്ന ഹുദവീസ് ഹെറാര്‍ഡില്‍ അബൂബക്കര്‍ ഹുദവി,ഡോ.ഹാരിസ് ഹുദവി,ജഅ്ഫര്‍ ഹുദവി ബംഗളത്ത് പ്രസംഗിക്കും. ഉച്ചക്ക് 2 മണിക്ക് അബ്ദുര്‍റശീദ് ഹുദവി ഏലംകുളം ‘വിശ്വാസിയുടെ യുക്തിയും സ്വാതന്ത്ര്യവും’ വിഷയം അവതരിപ്പിക്കും. പാണക്കാട് സയ്യിദ് അസീല്‍ അലി ശിഹാബ് തങ്ങള്‍ പങ്കെടുക്കും. ദുബൈ,അബൂദാബി ഹാദിയ സെന്ററുകളിലൂടെ സിബിഐഎസ് കോഴ്‌സ് പൂര്‍ത്തിയാക്കിയ 45 പഠിതാക്കള്‍ക്കുള്ള സനദ് ദാനം ദാറുല്‍ ഹുദാ വൈസ് ചാന്‍സലര്‍ ഡോ.ബഹാഉദ്ദീന്‍ മുഹമ്മദ് നദ്‌വി നിര്‍വഹിക്കും.
വൈകുന്നേരം 6 മണിക്ക് നടക്കുന്ന പ്രാര്‍ത്ഥനാ സംഗമത്തില്‍ മണ്‍മറഞ്ഞ സമസ്ത,ദാറുല്‍ ഹുദാ നേതാക്കള്‍ക്ക് പ്രത്യേക പ്രാര്‍ത്ഥന നടത്തും. പൊതുസമ്മേളനം ദാറുല്‍ ഹുദാ ചാന്‍സലര്‍ പാണക്കാട് സയ്യിദ് സാദിഖലി ശിഹാബ് തങ്ങള്‍ ഉദ്ഘാടനം ചെയ്യും. ഡോ.ബഹാഉദ്ദീന്‍ മുഹമ്മദ് നദ്‌വി അധ്യക്ഷനാകും. സമസ്ത കേരള ജംഇയ്യത്തുല്‍ ഉലമാ ട്രഷറര്‍ കൊയ്യോട് ഉമര്‍ മുസ്്‌ലിയാര്‍ അനുഗ്രഹ ഭാഷണം നടത്തും. ദഅ്‌വത്ത്:’ദാറുല്‍ ഹുദാ തുറന്ന പുതുവഴികള്‍’ വിഷയം ദാറുല്‍ ഹുദാ പുങ്കനൂര്‍ സെന്റര്‍ പ്രിന്‍സിപ്പല്‍ ശറഫുദ്ദീന്‍ ഹുദവി അവതരിപ്പിക്കും.’പണ്ഡിത ധര്‍മം ഉന്നത മാതൃകകള്‍’ വിഷയത്തില്‍ സുന്നി യുവജന സംഘം സംസ്ഥാന സെക്രട്ടറി ഓണമ്പിള്ളി മുഹമ്മദ് ഫൈസി മുഖ്യപ്രഭാഷണം നടത്തും. ഉസ്താദ് സിംസാറുല്‍ ഹഖ് ഹുദവി സമാപന സന്ദേശം നല്‍കും. മത സാമൂഹിക സാംസ്‌കാരിക രംഗത്തെ പ്രമുഖരും വിവിധ സംഘടനാ നേതാക്കളും പരിപാടിയില്‍ പങ്കെടുക്കും.
