ഈ കൊടും ചൂടില്‍ അങ്ങകലെ മലമുകളിലുള്ള ഗ്രാമത്തില്‍ ചെന്ന് രാപ്പാര്‍ക്കാം പച്ചയണിഞ്ഞ തോട്ടങ്ങളില്‍ മാതളം പൂത്തുലഞ്ഞോ എന്ന് നോക്കാം അവിടെ തളിര്‍ക്കാറ്റേറ്റ് അല്‍പമൊന്ന് മയങ്ങാം ഇത് സ്വപ്‌നമല്ല ഈ ഗ്രാമം എവിടെയാണെന്നല്ലേ…
ഗൾഫ് ചന്ദ്രിക
സുല്‍ത്താനേറ്റ് ഓഫ് ഒമാനില്‍ ഹജര്‍ പര്‍വ്വതനിരകള്‍ക്കിടയില്‍ സമുദ്രനിരപ്പില്‍ നിന്നും 10,000 അടി ഉയരത്തില്‍ സ്ഥിതി ചെയ്യുന്ന മലമുകളിലെ ഗ്രാമമാണ് ജബല്‍ അക്തര്‍. കൊടും ചൂടില്‍ ഒമാന്‍ പൊള്ളുമ്പോഴും മലമുകളിലെ ഈ ഗ്രാമം പച്ചപുതച്ച് നമുക്ക് തണുപ്പേകും. മനോഹരമായ മലനിരകളും താഴ്‌വരകളും കൊണ്ട് സമ്പന്നമാണ് ജബല്‍ അല്‍ അക്തര്‍. ഒമാനിലും യുഎഇ അടക്കമുള്ള ഗള്‍ഫ് രാജ്യങ്ങളിലും ചൂട് 50 ഡിഗ്രി സെള്‍ഷ്യസിന് അടുത്തെത്തുമ്പോള്‍ ജബല്‍ അക്തറില്‍ 32 ഡിഗ്രി സെള്‍ഷ്യസാണ് താപനില. കടുത്ത ചൂടില്‍നിന്ന് രക്ഷ നേടാനും സുഖകരമായ കാലാവസ്ഥ അനുഭവിക്കാനും അവധി ദിനങ്ങള്‍ ആഘോഷിക്കാനുമായി ആയിരകണക്കിന് ആളുകളാണ് ഇവിടേക്ക് യാത്രചെയ്യുന്നത്. അയല്‍ രാജ്യങ്ങളില്‍നിന്നും വിദേശ രാജ്യങ്ങളില്‍നിന്നും ഈ സീസണില്‍ ഒമാനിലെത്തുന്ന വിനോദ സഞ്ചാരികളുടെ പ്രധാന ലക്ഷ്യവും ജബല്‍ അക്തര്‍ തന്നെയായിരിക്കും. നല്ല കാലാവസ്ഥയ്‌ക്കൊപ്പം മാതളത്തോട്ടങ്ങള്‍ പൂത്ത് കായ്ച്ച് നില്‍ക്കുന്ന സമയം കൂടിയാണിത്. മുന്തിയ ഇനം മാതളം ജബല്‍അക്തറിന്റെ പ്രത്യേകതയാണ്. മുന്തിരി, ആപ്പിള്‍, ബദാം, അത്തിപ്പഴം, പീച്ച് തുടങ്ങിയ പഴങ്ങളുടെ തോട്ടങ്ങള്‍ ജബല്‍ അക്തറിനെ കൂടുതല്‍ സുന്ദരിയാക്കുന്നു.
വസന്തകാലത്തെ റോസാ പൂ തോട്ടങ്ങള്‍ മലമുകളില്‍ സുഗന്ധപൂരിതമാക്കും. ഈ ഗ്രാമത്തില്‍ ഉല്‍പാദിപ്പിക്കുന്ന റോസ് വാട്ടര്‍ ലോക പ്രശസ്തമാണ്. ഒമാന്റെ തലസ്ഥാനമായ മസ്‌കത്തില്‍ നിന്നും ഇവിടേക്ക് രണ്ടര മണിക്കൂര്‍ യാത്രയുണ്ട്. മലമ്പാതയിലൂടെ 40 കിലോമീറ്റര്‍ യാത്ര ചെയ്ത് വേണം മുകളിലെത്താന്‍. ഹെയര്‍പിന്‍ വളവുകളും ചെങ്കുത്തായ പാതകളും ഒക്കെയായി ഓഫ് റോഡ് ഇഷ്ടപ്പെടുന്നവര്‍ക്കും സാഹസികത ഇഷ്ടപ്പെടുന്നവര്‍ക്കും ഒരുപോലെ ആസ്വദിക്കാന്‍ കഴിയുന്ന വഴികളാണ് ജബല്‍ അക്തറിലേക്കുള്ളത്. ഫോര്‍വീല്‍ ഡ്രൈവുള്ള മികച്ച കണ്ടീഷനുള്ള വാഹനങ്ങളില്‍ വേണം ഇവിടേക്ക് യാത്ര പുറപ്പെടാന്‍. ഏപ്രില്‍ പകുതിയോടെ പൂവിടുന്ന മാതള തോട്ടങ്ങളില്‍ ആഗസ്റ്റ് പകുതി മുതല്‍ ഒക്ടോബര്‍ അവസാനം വരെ വിളഞ്ഞു നില്‍ക്കും. ഇവിടെയുള്ള ഗ്രാമവാസികളുടെ പ്രധാന ജീവിതമാര്‍ഗം കൃഷിയും കന്നുകാലി വളര്‍ത്തലുമാണ്. എല്ലാ കാലാവസ്ഥയിലും പ്രകൃതി പൂത്തുനില്‍ക്കുന്ന ജബല്‍അക്തര്‍ ആകര്‍ഷകമാണ്.
